Huawei បង្ហាញចំណាប់អារម្មណ៍ចង់វិនិយោគលើគម្រោងប្រព័ន្ធព័ត៌មានវិទ្យាតាមអនឡាញ

ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានទទួលជួបពិភាក្សាការងារ ជាមួយប្រតិភូក្រុមហ៊ុន Huawei Technology (Cambodia) Co., Ltd. ដែលដឹកនាំដោយលោក YAO Yuya នាយកប្រតិបត្តិក្រុមហ៊ុនប្រចាំកម្ពុជា ដោយមានការចូលរួមពីថ្នាក់ដឹកនាំក្រសួង និងមន្ត្រីជំនាញ ពាក់ព័ន្ធដោយបង្ហាញពីការប្រើប្រាស់ប្រព័ន្ធព័ត៌មានវិទ្យានៃបដិវត្តឧស្សាហកម្មជំនាន់ ៤.០ ដើម្បីផ្តល់សេវាសាធារណៈជូនប្រជាពលរដ្ឋកម្ពុជា ប្រកបដោយ ប្រសិទ្ធភាព តម្លាភាព ដែលក្នុងនោះរួមមាន៖ ប្រព័ន្ធស្វ័យប្រវត្តិកម្មការចុះបញ្ជីយានយន្ត ការត្រួតពិនិត្យ លក្ខណៈបច្ចេកទេសយានយន្ត កម្មវិធីថែទាំផ្លូវROAD CARE Mobile App និងការត្រៀមដាក់ឲ្យប្រើប្រាស់ឧបករណ៍ តាមដានល្បឿនបើកបររបស់អ្នកបើកបរ និងតម្រាយផ្លូវធ្វើដំណើរ ប្រមាណ១២០គ្រឿងរបស់ក្រុមហ៊ុន Baidu ជាដើម។