ប្រជុំផ្សព្វផ្សាយពីស្ថានភាពអាកាសធាតុ និងការប្រើប្រាស់ទឹកធ្វើស្រែនារដូវប្រាំងខាងមុខ

កំពង់ចាម៖ ព្រឹកថ្ងៃសុក្រ ៦រោច ខែមិគសិរ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ២៨ ខែធ្នូ ឆ្នាំ ២០១៨ ឯកឧត្តម ថោ ជេដ្ឋា រដ្ឋលេខាធិការក្រសួងធនធានទឹក និងឧតុនិយម បានចុះទៅកាន់នៅស្រុកបាធាយ ខេត្តកំពង់ចាម ដើម្បីធ្វើការប្រជុំផ្សព្វផ្សាយពីស្ថានភាពអាកាសធាតុ និងការប្រើប្រាស់ទឹកធ្វើស្រែនារដូវប្រាំងខាងមុខ ដោយមានការចូលរួមពីលោកប្រធានមន្ទីរធនធានទឹក និងឧុតនិយមខេត្ត អាជ្ញាធរស្រុក លោកមេឃុំទាំង ១២ លោក-លោកស្រីជាប្រធានការិយាល័យជំនាញជុំវិញស្រុក សហគមន៍កសិករប្រើប្រាស់ទឹក និងកងកម្លាំងប្រដាប់អាវុធទាំង ៣ សរុបចំនួន ៤០ នាក់ ។

សូមជម្រាបជូនថា មកដល់ពេលបច្ចុប្បន្ននេះ ដំណាំស្រូវវស្សានៅទូទាំងស្រុកបាធាយ ត្រូវបានប្រជាកសិករធ្វើការប្រមូលផលចប់សព្វគ្រប់ហើយ លើផ្ទៃដីដែលបានផលិត ២១.០៩០ ហត ខណៈការបង្កបង្កើនផលស្រូវប្រាំងសម្រេចបានប្រមាណ ៧៨% លើផែនការដែលបានដាក់ចុះ ១៥.៨០០ ហត ។

បន្ទាប់មក ឯកឧត្តមរដ្ឋលេខាធិការ និងក្រុមការងារ ក៏បានបន្តចុះពិនិត្យការបង្កបង្កើនផលស្រូវប្រាំងនៅក្នុងប្រព័ន្ធធារាសាស្រ្ត អាងទឹកឫស្សីព្រះ ស្ថិតក្នុងឃុំមេព្រីង ស្រុកបាធាយ ។ នៅក្នុងប្រព័ន្ធនេះ ប្រជាកសិករបានធ្វើការបង្កបង្កើនផលស្រូវប្រាំងលើផ្ទៃដីចំនួន ៤៨៦ ហិកតា ហើយស្ថានភាពទឹកដែលមាននៅក្នុងប្រព័ន្ធ គឺអាចធានាផ្គត់ផ្គង់បានទាំងស្រុង ។