ថ្ងៃពធ ទី ៨ ខែមេសា ឆ្នាំ២០២០នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចេញសេចក្តីណែនាំជូនដល់សាខាកាកបាទក្រហមកម្ពុជា ទាំង២៥រាជធានី-ខេត្ត ដែលសេចក្តីណែនាំនោះមានខ្លឹមសារថា «ក្នុងស្ថានភាពដែលពិភពលោក ក៏ដូចជាព្រះរាជាណាចក្រកម្ពុជា កំពុងខិតខំប្រឹងប្រែងក្នុងយុទ្ធនាការប្រយុទ្ធប្រឆាំងជំងឺកូវីដ-១៩ ខ្ញុំសូមណែនាំ ឯកឧត្តម លោកជំទាវ ប្រធានគណៈកម្មាធិការសាខាកាកបាទក្រហមកម្ពុជា ទាំង២៥រាជធានី-ខេត្ត សូមមានវិធានការចាត់អនុសាខាតាមស្រុក ក្រុមកាកបាទក្រហមកម្ពុជា តាមឃុំ និងអ្នកស្ម័គ្រចិត្តកាកបាទក្រហមកម្ពុជាតាមភូមិនីមួយៗយកចិត្តទុកដាក់ ពិនិត្យមើលការខ្វះខាតផ្នែកជីវភាពរបស់ប្រជាជនងាយរងគ្រោះ មានជាអាទិ៍ ជនចាស់ជរាឥតទីពឹង ជនមានពិការភាព ស្ត្រីមេម៉ាយមានកូនច្រើន កុមារកំព្រា អ្នកមានជំងឺរ៉ាំរ៉ៃ នៅតាមភូមិ-ឃុំ-ស្រុក ក្នុងរដ្ឋបាលដែនដីរបស់ខ្លួន និងសូមធ្វើការដោះស្រាយឱ្យអស់លទ្ធភាព និងបានឆាប់ជាទីបំផុតផ្គត់ផ្គង់អង្ករ មី ត្រីខ ជូនគ្រួសារខ្វះខាតទាំងនោះឱ្យស្របតាមអនុសាសន៍ របស់ សម្តេចអគ្គមហាសេនាបតីតេជោ នាយករដ្ឋមន្ត្រីនៃព្រះរាជាណាចក្រកម្ពុជា «កម្ពុជាពេលនេះ គឺកំពុងបញ្ចេញកម្លាំងខិតខំធ្វើការ ដើម្បីជាផលប្រយោជន៍របស់ប្រជាពលរដ្ឋយើង។ កុំទុកឱ្យប្រជាពលរដ្ឋណាម្នាក់ស្លាប់ដោយយើងមិនបានដឹង ហើយមិនបានដោះស្រាយ»។
No comments:
Post a Comment