រដ្ឋមន្រ្តីក្រសួងកសិកម្ម រុក្ខាប្រមាញ់និងនេសាទចុះពិនិត្យស្រូវប្រាំង ស្ថិតក្នុង ស្រុកទ្រាំង ខេត្តតាកែវ

នៅព្រឹកថ្ងៃចន្ទ ទី១៣ ខែមីនា ឆ្នាំ២០២០ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់និងនេសាទ រួមដំណើរជាមួយឯកឧត្តមអភិបាល នៃគណៈអភិបាលខេត្តតាកែវ និងសហការី បានចុះពិនិត្យស្រូវប្រាំង ស្ថិតក្នុងភូមិរវៀង ឃុំសំបូរ ស្រុកទ្រាំង ខេត្តតាកែវ ដែលនៅសេសសល់ផ្ទៃដីដាំដុះដំណាំស្រូវប្រមាណជា ៤ ពាន់ហិកតា ដល់ពេលប្រមូលផល ដែលអាចទទួលបានផលស្រូវសរុបចំនួនប្រមាណជាមួយម៉ឺនប្រាំពីរពាន់តោន។ តាមការជួបសំណេះសំណាល រវាង ឯកឧត្តម រដ្ឋមន្រ្តី និងប្រជាកសិករ នៅទីនោះបានឲ្យដឹងថា ប្រជាពលរដ្ឋពិតជាមានចិត្តសប្បាយរីករាយជាខ្លាំង ព្រោះមានក្រុមឈ្មួញបានមកចុះប្រមូលទិញស្រូវដល់ស្រែ មានតម្លៃល្អ គឺ ៨២០ រៀលក្នុងមួយគីឡូក្រាម (លើសពីឆ្នាំទៅ ១២០ រៀលក្នុងមួយគីឡូក្រាម) បើទោះបីប្រមុខរាជរដ្ឋាភិបាល បានប្រកាសជាផ្លូវការក្នុងការផ្អាកនាំចេញស្រូវ និងអង្ករសរទៅក្រៅប្រទេសនាពេលថ្មីៗនេះយ៉ាងណាក៏ដោយ។​