ក្រសួងបរិស្ថានរៀបចំសិក្ខាសាលាពិគ្រោះយោបល់ថ្នាក់ជាតិស្តីពីផែនការកំណត់តំបន់គ្រប់គ្រងធនធានសមុទ្រ

ភ្នំពេញ៖ នាព្រឹកថ្ងៃអង្គារ ៣រោច ខែមិគសិរ ឆ្នាំច សំរិទ្ធស័ក ព.ស២៥៦២ ត្រូវនឹងថ្ងៃទី២៥ ខែធ្នូ ឆ្នាំ២០១៨ ក្រសួងបរិស្ថានរៀបចំសិក្ខាសាលាពិគ្រោះយោបល់ថ្នាក់ជាតិស្តីពីផែនការកំណត់តំបន់គ្រប់គ្រងធនធានសមុទ្រ ក្រោមអធិបតីភាព ឯកឧត្តម ស្រ៊ុន ដារិទ្ធិ រដ្ឋលេខាធិការ ក្រសួងបរិស្ថាន តំណាងដ៏ខ្ពង់ខ្ពស់ ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន។ ក្រសួងបរិស្ថាន បានកិច្ចសហការជាមួយ វិទ្យាស្ថានជាតិបច្ចេកវិទ្យាសមុទ្រចិន (NOTC)បានរៀបចំព្រឹត្តិការណ៍ដ៏មាន សារៈសំខាន់នេះ ដោយអនុលោមស្របតាមខ្លឹមសារអនុស្សរណៈយោគយល់រវាងក្រសួងបរិស្ថាន ជាមួយរដ្ឋបាលសាគរចិន ស្តីពីកិច្ចសហការលើវិស័យបរិស្ថានសមុទ្រ ដែលបានចុះហត្ថលេខាក្រោម អធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និង ឯកឧត្តម ស៊ី ជីនពីង  ប្រធានាធិបតីនៃសាធារណរដ្ឋប្រជាមានិតចិន ដ៏មហោឡារឹកនាវិមានសន្តិភាពកាលពីឆ្នាំ ២០១៦ កន្លងទៅ។