សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងគណៈប្រតិភូ អញ្ជើញចុះសួរសុខទុក្ខ ផ្តល់អំណោយមនុស្សធម៌ និងរៀបចំអាហារដល់ កុមារពិការ បុគ្គលិក និងអ្នកស្ម័គ្រចិត្តបរទេសចំនួន ២២៥នាក់ នៃបុរីទារក និងកុមារជាតិ និងកុមារ-បុគ្គលិក ចំនួន ៥០នាក់ នៃអង្គការទន្សាយ (មានថ្នាក់រៀននៅក្នុងបុរីទារកនិងកុមារជាតិ) ដែលស្ថិតនៅភូមិតំណាក់៣ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
ក្នុងឱកាសនោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានថ្លែងអំណរគុណ និងកោតសរសើរចំពោះ លោកគ្រូ អ្នកគ្រូ បុគ្គលិកទាំងអស់ ពិសេស អ្នកស្ម័គ្រចិត្តបរទេស ដែលបានបរិច្ចាគកម្លាំងកាយ-ចិត្ត ចូលរួមមើលថែទាំកុមារដោយក្តីអាណិតស្រឡាញ់ ពិតៗ និងសូមបន្តយកចិត្តទុកដាក់ថែទាំក្មួយៗកុមារទាំងអស់នោះទៀត។ ជាមួយគ្នានេះ សម្តេចកិត្តិព្រឹទ្ធបណ្ឌិតប្រធាន បានផ្តាំផ្ញេីដលកុមារ-សិស្សដែលមានកាយសម្បទាល្អ ត្រូវកសាងអំពេីល្អ ខិតខំរៀនសូត្រ ស្តាប់លោកគ្រូអ្នកគ្រូ និងមានសីលធម៌ល្អក្នុងការរស់នៅ។
ទន្ទឹមនឹងនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងគណៈប្រតិភូ បានអញ្ជើញជួបសួរសុខទុក្ខដោយផ្ទាល់ ផ្តល់ក្តីអាណិត ស្រឡាញ់ មេត្តា ករុណា និងបញ្ចុកអាហារដ៏ឆ្ងាញ់ពិសាដល់កុមារទាំងអស់ដោយក្តីស្និទ្ធស្នាលជាទីបំផុត។
គួររំលឹកថា នេះជាលេីកទី ៤ ដែលកាកបាទក្រហមកម្ពុជា បានចុះសួរសុខទុក្ខ និងផ្តល់អំណោយដល់បុរីទារក និងកុមារជាតិ គិតចាប់ពីឆ្នាំ២០១៦ រៀងមក៕
No comments:
Post a Comment